මහ ගිනි-කුරුල්ලා/ලෝහවන්නිච්චා (Harpactes fasciatus)

 එතරම් සුලභ නොවන ලෙසට පහත රට තෙත් කලාපයේ සිට කදුකරය දක්වා ඝන කැලෑ වල දැකිය හැකි දේශීය පක්ෂියෙකි. වියලි කලාපීය වනාන්තර වලද ස්ථානීය වශයෙන් දුර්ලභ ලෙස හමුවේ. ජෝඩු වශයෙන් හෝ කුඩා රංචු ලෙස දිවි ගෙවන මෙම පක්ෂියා, කුරුමිණියන්, සලබයන්, දරමිටියන් වැනි පියාඹන කෘමීන් ආහාරයට ගන්නා අතර,  බොහෝ විට උදෑසන හෝ සවස් කාලයේ නිසොල්මන්ව ගසක අත්තක් මත වසාසිට එක්වරම ඉගිලී ගොස් එවන් සතුන් දඩයම් කරයි. එකම මගක දිනපතා විවිධ වර්ගයේ පක්ෂීන් එකතු වී  ආහාර සොයා යන පක්ෂි රංචු සමගද ගමන් ගන්නා මෙම මහ ගිනි කුරුල්ලා පෙබරවාරි සිට ජූනි දක්වා කාලයේ දිරාගිය හෝ මැරිච්ච ගසක කදේ බෙනයක් තුල බිත්තර 2ත් 3ත් අතර ප්‍රමාණයක් දමා අභිජනනය කරයි. ගැහැණු සහ පිරිමි පක්ෂීන් දෙදෙනාම එක්ව බිත්තර රැකීමේ නිරත වේ.

English Post >>

මහ රන් කෑරලා/සුදුගෙලැසි මහ කෑරලා(Chrysocolaptes festivus)

එතරම් සුලභ නොවන ලෙස පහතරට වියලි කලාපයේ, ප්‍රධාන වශයෙන් පොල් වතු වල දැකිය හැකි දේශිය පක්ෂියෙකි. ගම්පහ වැනි තෙත් කලාපයේ ඇතැම් ප්‍රදේශ වලද විසිරුණු  කුඩා ගහණයන් ස්ථානීය වශයෙන් හමුවේ. ප්‍රධාන වශයෙන් ගස් කඳන් සහ අතු වල දැව තුල ගුල් හාරා වෙසෙන කෘමීන් ආහාරයට ගන්නා මෙම කෑරලා පොල් වැනි ගසක කඳ තුලට හාරන ලද බෙනයක බිත්තර දෙකක් දමා අභිජනනය කරයි. අභිජනන සමය ජනවාරි සිට මාර්තු දක්වා සහ බොහෝවිට නැවතත් අගෝස්තු සිට සැප්තැම්බර් දක්වා මාස වල සිදුවේ. 

English Post >>

ගෝමර කෑරලා/කහ සිළු පිරි කෑරලා (Leiopicus maharattensis)

 එතරම් සුලභ නොවන ලෙස පහත රට වියලි කලාපයේ සිට වියලි කලාපයට අයත් කඳුකරයේ මධ්‍යම උස් මට්ටම් දක්වා වනාන්තර, හොඳින් ගහ කොළ සහිත ප්‍රදේශ සහ විවෘත ගහ කොළන් සහිත ප්‍රදේශ වල හමුවන දේශීය පක්ෂියෙකි. තවද මහනුවර ආශ්‍රිත තෙත් කලාපීය කඳුකරයේ පහල ප්‍රදේශ වලද විසිරුණු ගහණ ලෙසින් දැකිය හැක. ජෝඩු වශයෙන් හෝ කුඩා පවුල් රංචු ලෙසින් දිවිගෙවන මෙම කෑරලා ප්‍රධාන වශයෙන් කෘමීන් ආහාරයට ගනී. පෙබරවාරි සිට ජූලි දක්වා කාලයේ ගසක කදක හෝ අත්තක පහල ප්‍රදේශයේ හාරන බෙනයක බිත්තර දෙකක් හෝ තුනක් දමා අභිජනනය කරයි.

English Post >>

මහා ලිහිණි ඔලෙය්යා/පෙරදිගු ජවසැරියා (Glareola maldivarum)

එතරම් සුලභ නොවන ලෙස ස්ථානීය වශයෙන් වෙරළබඩ  වියලි විවෘත භූමි සහ තෘණ භූමි වලත් පහත රට වියලි කලාපයේ වැව් ඉවුරු ආශ්‍රිතවත් හමුවන දේශීය පක්ෂියෙකි. එසේම උත්තර අර්ධගෝලයේ රටවල ශීත සෘතුව පවතින මාස වලදී මෙරටට සංචාරය කරන පක්ෂීන්ද සිටින අතර, ඇතැම් විට ඔවුන් විශාල රංචු ලෙසින්ද හමුවේ. කුඩා සහ විශාල රංචු ලෙසින් දිවිගෙවන මහ ලිහිණි ඔලෙයියන් උදෑසන සහ සවස් කාලයේදී ක්‍රියාශීලි වන අතර කුරුමිණියන්, සලබයන් වේයන් වැනි පියාඹන කෘමීන් බොහෝවිට රංචු ලෙසින් ඉගිලී ගොස් ගොදුරු කරගනී. දිවා කාලයේදී පොළව මත විවේකීව සිටින අතර ඇතැම් අවස්ථා වලදී ඔලෙවියන් මෙන් එහෙ මෙහෙ දුවන අයුරු නිරීක්ෂණය කල හැක. මාර්තු සිට ජූලි දක්වා කාලයේ කූඩුවක් නොසාදා පොළොව මත, බොහෝවිට වියලි ගොම ගොඩක් මත බිත්තර දෙකක් දමා අභිජනනය කරයි.

 English Post >>

දික්පෙඳ සබරිත්තා/ගුරු ඇස්පටියා (Lanius schach)

 ප්‍රධාන වශයෙන් උතුරු සහ වයඹ දිග වියලි සහ ශුෂ්ක කලාප වල එතරම් සුලභ නොවන ලෙස දැකිය හැකි දේශීය පක්ෂියෙකි. උතුරු මැද පලාතේ ඇතැම් ප්‍රදේශ වලද දුර්ලභ ලෙසින් හමුවේ. විවෘත භූමි, වනාන්තර මෙන්ම ලඳු කැලෑ වලද තනිව හෝ ජෝඩු ලෙසින් දිවි ගෙවන දික්පෙඳ සබරිත්තා පඳුරක විවෘත අත්තක් මත හෝ කණුවක් මත සිට ඉගිලෙමින් අහසේ සැරිසරන පලගැටියන්, කුරුමිණියන් වැනි කෘමීන් ගොදුරු කර ගනී. තවද කුඩා උරගයන් සහ ගෙම්බන්ද, ඇතැම් අවස්ථා වලදී කූඩුවල සිටින කුරුළු පැටවුන්ද දඩයම් කරයි. වසරේ පෙබරවාරි සිට ජූනි දක්වා කාලයේ තණකොළ, ශාක මුල්, වැල් ආදිය උපයෝගි කරගනිමින් ඇකේෂියා වැනි කටු සහිත  ගසක් මත තනන කෝප්පයක හැඩැති කූඩුවක බිත්තර 2 ත් 4 ත් අතර ප්‍රමාණයක් දමා අභිජනනය කරයි. 

English Post >>

ගෙල සුදු වී කුරුල්ලා (Lonchura malabarica)

ප්‍රධාන වශයෙන් පහත රට වියලි කලාපයේ මන්නාරම, යාපනය සහ හම්බන්තොට දිස්ත්‍රික්ක වල ශුෂ්ක වෙරල තීරයේ තෘණ භූමි, කුඹුරු සහ වෙනත් වගා බිම් වල එතරම් සුලභ නොවන ලෙස හමුවන දේශීය පක්ෂියෙකි. වියලි කලාපයේ සමහර ප්‍රදේශ වල ස්ථානීය වශයෙන් හුදකලා සමූහයන්ද ඇතැම් විට දැක ගත හැක. තෘණ බීජ, වී ආදි දේ ආහාරයට ගන්නා මෙම වී කුරුල්ලා බොහෝවිට 10-12 පමණ රංචු ලෙසින් හමුවන මුත් ඇතැම් අවස්ථා වලදී විශාල රංචු ලෙසින්ද දැකගත හැක. ගෙල සුදු වී කුරුල්ලා වසරේ දෙසැම්බර් සිට මාර්තු දක්වා කාලයේ වෙනත් වී කුරුල්ලන් මෙන් තෘණ භාවිතයෙන් ගෝලාකාර කූඩුවක් තනා එහි බිත්තර 4 සිට 6 දක්වා ප්‍රමාණයක් දමා අභිජනනය සිදු කරයි.

 English Post >>

කොණ්ඩ කවුඩා/ශ්‍රී ලංකා සිළු කවුඩා (Dicrurus lophorinus)

පහත රට තෙත් කලාපයේ සිට කඳුකරයේ මධ්‍යම උස් මට්ටම් දක්වා උස් වනාන්තර සහ වනාන්තර ආශ්‍රිත හොඳින් ගහ කොළ සහිත ගෙවතු සහ වෙනත් එවැනි පරිසර පද්ධති වල ස්ථානීය වශයේන් සුලභ මෙරටට ආවේනික පක්ෂියෙකි. ජෝඩු හෝ කුඩා රංචු වශයෙන් හැසිරෙන මෙම පක්ෂියා ප්‍රධාන වශයෙන් ඉගිලෙන කෘමීන් ගොදුරු කර ගනී. අප්‍රියෙල් සිට මැයි දක්වා කාලයේ උස් ගසක උඩු වියනේ අත්තක් මත කෝප්පයක හැඩැති කූඩුවක් තනා අභිජනනය කරයි.

 English Post >>

බඩරතු රාජාලියා/කුසරත් සිළුකුස්සා (Lophotriorchis kienerii)

දිවයින පුරාම පාහේ වනාන්තර සහ හොඳින් ගහ කොළ සහිත ප්‍රදේශ වල දුර්ලභ ලෙසින් හමුවන දේශීය පක්ෂියෙකි. ජෝඩු ලෙසින් හෝ තනි තනි පක්ෂීන් ලෙසින් දිවි ගෙවන මෙම රාජාලියා ප්‍රධාන වශයෙන් වෙනත් පක්ෂීන්, විශේෂයෙන් පරවියන් ගොදුරු කර ගනී. අහසේ ඉහල සිට වේගයෙන් එවන් පක්ෂීන් හඹා ගොස් අල්ලා ගන්නා අතර එයට අමතරව කුඩා ක්ෂිරපායින් සහ උරගයන්ද ආහාරයට ගනී. වසරේ දෙසැම්බර් සිට මාර්තු දක්වා කාලයේ ගසක් මත කෝටු කැබැලි ගොඩ ගසා වටේට ශාක පත්‍ර යොදා තනන කූඩුවක එක් බිත්තරයක් දමා අභිජනනය කරයි.

English Post >>

ලය තැඹිලි මැසිමාරා/ලය රන් නිල් මැසිමාරා (Niltava tickelliae jerdoni)

දිවයිනේ සෑම දේශගුණික කලාපයකම පාහේ වනාන්තර මෙන්ම ගෙවතු  සහ වගා බිම් වල හොඳින් වදුල සහිත ස්ථාන වල සුලභ දේශීය පක්ෂියෙකි. බොහෝවිට දිය පාරවල් දෙපස හමුවන මෙම පක්ෂියා හවස් කාලයේදී ඉතාමත් ක්‍රියාශීලි වේ. යටිරෝපනයේ එහෙ මෙහෙ ඉගිලෙමින් ප්‍රධාන වශයෙන් කුඩා ඉගිලෙන කෘමීන් ආහාරයට ගන්නා ලය තැඹිලි මැසිමාරා වසරේ පෙබරවාරි සිට ජූනි දක්වා මාස වල පාසි, ශාක පත්‍ර වල නටු, දිරාගිය කොළ කැබලි, කුඩා කෙඳි වැනි දේ භාවිතා කරමින් කණ්ඩියක වූ කුහරයක හෝ නොඋස් කොටයක සාදනු ලබන කෝප්පයක හැඩැති කූඩුවක බිත්තර දෙකක් හෝ තුනක් දමා අභිජනනය කරයි.  

English Post >>

මූකලන් කොට්ටෝරුවා (Megalaima rubricapillus)

 පහත රට තෙත් කලාපීය ප්‍රදේශ වල සිට කඳුකරයේ මධ්‍යම උස් මට්ටම් දක්වා වනාන්තර සහ ගස් කොළන් සහිත ගෙවතු වල ස්ථානීය වශයෙන් සුලභ ආවේනික පක්ෂියෙකි. නැගෙනහිර කඳුකර ප්‍රදේශ වල සහ ඉහල කඳුකර එවන් පරිසර පද්ධති වලද එතරම් සුලභ නොවන ලෙසින් හමුවේ. ප්‍රධාන වශයෙන් පළතුරු ආහාරට ගන්නා මූලකන් කොට්ටොරුවා පෙබරවාරි සිට මැයි දක්වා මාස වල සහ නැවතත් අගෝස්තු සිට සැප්තැම්බර් දක්වා කාලයේ අභිජනනය කරයි. එහෙත් වසරේ වෙනත් මාස වලද කලාතුරකින් අභිජනනය කරන බව නිරීක්ෂණය කර ඇත. මියැදුනු ගසක මෘදු කඳේ හෝ අත්තක හාරන ලද බෙනයක බිත්තර දෙකක් හෝ තුනක් දමා අභිජනනය කරයි.

English Post >> 

උකුසු බස්සා/දුඹුරු උකුසු බස්සා(Ninox scutulata)

 දිවයින පුරා වනාන්තර, වගා බිම් සහ ගහ කොළ සහිත නගර සහ ගම්මාන ආශ්‍රිතවද හමුවන දේශීය පක්ෂියෙකි. එහෙත් ඉහල කඳුකරයේ එතරම් සුලභ නොවේ. තරමක් දුරට තුරු වදුලින් යුත් කොළඹ සහ ඒ අවට ප්‍රදේශද ඇතුලත් නාගරික සහ අර්ධ නාගරික ප්‍රදේශ වල විදුලි හෝ දුරකතන කණු මත හෝ වහලවල් මත තිබෙන රූපවාහිනි ඇන්ටෙනා මත රාත්‍රී කාලයේදී වසා සිටින මෙම බස්සාගේ දර්ශනය එතරම් දුලභ දසුනක් නොවේ. බොහෝවිට සඳ එළිය සහිත රාත්‍රී වලදීත් වෙනත් දිනවලත් ඇසෙන  කූක්..කූක් නාදය මගින් මෙම පක්ෂියා එම ප්‍රදේශයේ සිටින බව පහසුවෙන් හඳුනාගත හැක. රාත්‍රී කාලයේදී ක්‍රීයාකාරි උකුසු බස්සා යම් ස්ථානයක සිට වරින් වර ඉගිලී ගොස් ගොදුරු කරගන්නා කෘමීන් ආහාරයට ගනී. උකුසු බස්සා මාර්තු සිට අප්‍රියෙල් දක්වා කාලයේ සහ නැවතත් නොවැම්බර් මාසයේ ගස් බෙනයක බිත්තර 2 ක් හෝ 3 ක් දමා අභිජනනය කරයි.

English Post >>

ලබු ගිරවා (Psittacula eupatria)

ලබු ගිරවා පහත රට ප්‍රදේශ වල සිට කඳුකරයේ මධ්‍යම උස් මට්ටම් දක්වා එතරම් සුලභ නොවන ලෙස හමුවන දේශීය පක්ෂියෙකි. එහෙත් ඇතැම් ප්‍රදේශ වල ස්ථානීය වශයෙන් සුලභව දැකිය හැක. ප්‍රධාන වශයෙන් වියලි කලාපයේ හමුවන මුත් තෙත් කලාපයේද කලාතුරකින් දැකිය හැක. ජෝඩු වශයෙන් හෝ කුඩා හෝ විශාල රංචු වශයෙන් වනාන්තර සහ ගහ කොළන් සහිත පරිසර පද්ධති වල සැරිසරමින් පළතුරු, බීජ වර්ග සහ ධාන්‍ය ආහාරයට ගන්නා ලබු ගිරවා නොවැම්බර් සිට මැයි දක්වා කාලයේ විශාල මැරුණ හෝ එසේ නොවන ගසක ස්වාභාවිකව ඇතිවූ හෝ කෑරළුන් විසින් තැනූ කුහරයක් තම අවශ්‍යතාවය පරිදි විශාල කරගෙන තැනූ බෙනයක බිත්තර 2 ත් 4 ත් අතර ප්‍රමාණයක් දමා අභිජනනය කරයි 

English Post >>
 

පන් වඩුකුරුල්ලා (Ploceus manyar flaviceps)

පන් වඩුකුරුල්ලා පහත රට වියලි කලාපයේ වගුරු බිම් සහ වැව් ඉවුරු වල දැකිය හැකි උස් පන් ගාල් වල ස්ථානීය වශයෙන් සුලභ දේශීයව අභිජනනය කරන පක්ෂියෙකි. ප්‍රධාන වශයෙන් වෙරළාශ්‍රිත එවන් පරිසර පද්ධති වල දැකිය හැක. කලාතුරකින් පහත රට තෙත් කලාපයේ එවන් ස්ථාන වලටද සංක්‍රමණය වේ. රංචු වශයෙන් හැසිරෙන පන් වඩුකුරුල්ලා කුඹුරු සහ වගුරු බිම් වල බීජ වර්ග සහ කෘමින් ආහාරයට ගනිමින් ජීවත් වේ. පෙබරවාරි සිට ඔක්තෝබර් දක්වා මාස වල පන් ගාල් වල විසිරුණු කොලනි වශයෙන් ගෝලාකාර කූඩු තනා අභිජනනය කරයි. පන් වඩු කුරුල්ල සිය කූඩුව රුක් වඩු කුරුල්ලාගේ කූඩුවට වඩා කෙටි පිවිසුමක් සහිතව පන් වලින් තනයි.  

English Post >>

මහ වැලි ඔලෙය්යා/රජ වැලි ඔලෙවියා (Charadrius leschenaultii)

 මුහුදු වෙරළ, කලපු, ගංගා මෝය වල ඉවුරු සහ වෙරළාශ්‍රිත මඩ වගුරු ආදියෙහි තරමක් දුර්ලභ ලෙස හමුවන සංචාරක පක්ෂියෙකි. ප්‍රධාන වශයෙන් වියලි කලාපයෙහි එවන් පරිසර පද්ධති වල හමුවේ. තනි තනි පක්ෂීන් වශයෙන් හෝ කුඩා රංචු ලෙසින් කුඩා භෞමික කෘමීන්, කකුළුවන්, ඉස්සන් වැනි ක්‍රස්ටේෂීයන් පවුලේ සතුන් සහ පණුවන් ගොදුරු කරගනිමින් වෙසේ. ඈත පෙරදිග ආසියානු ප්‍රදේශවල සහ ජපානයේ අභිජනනය කරයි.

English Post >>

වැලි සිලිවටුවා/වැලි හින්නා (Calidris alba)

ප්‍රධාන වශයෙන් උතුරු, වයඹ සහ ගිණිකොණදිග වෙරළ තීරයන්හි එතරම් සුලභ නොවන ලෙස හමුවන සංචාරක පක්ෂියෙකි. කුඩා හෝ මධ්‍යම ප්‍රමාණයේ රංචු ලෙසින් වෙරළේ මුහුදු රල වෙරළ සමග හැපී ආපසු යනවිට ඒ සමග වේගයෙන් ඇවිදිමින් වෙරළට ගොඩගසන කුඩා අපෘෂ්ඨවංශී සතුන් ගොදුරු කරගනිමින් වාසය කරයි. වැලි සිලිවටුවා උතුරු අර්ධගෝලයේ ඈත තුන්ද්‍රා බිම් වල අභිජනනය කරයි.

English Post >>

 

දාර මහවටුවා/වයිර පෙඳ ගොහොදුවිත්තා (Limosa lapponica)

 දිවයිනේ උතුරු ප්‍රදේශයේ වෙරළබඩ කලපු, මඩ වගුරු, ගංගා මෝය වැනි පරිසර පද්ධති වලට ලෝකයේ උතුරු අර්ධගෝලයේ රටවල ශීත සෘතුව බලපැවැත්වෙන කාලයේදී පැමිණෙන දුර්ලභ සංචාරක පක්ෂියෙකි. කලාතුරකින් දිවයිනේ දකුණු ප්‍රදේශයේ වෙරළබඩ ප්‍රදේශ වලින්ද පක්ෂීන් වාර්තා වී ඇත. නොගැඹුරු ජලයේ බැස ගමන් කරමින් පණුවන්, කකුළුවන් සහ වෙනත් එවැනි කුඩා ජලජ සත්වයන් ගොදුරු කරගන්නා දාර මහවටුවා තනි තනි පක්ෂීන් ලෙසින් හෝ කුඩා රංචු ලෙසින් හමුවේ.

English Post >>

කකුළු ඔලෙවියා (Dromas ardeola)

උතුරු සහ වයඹ දිග මුහුදු වෙරළ, කලපු, ගංගා මෝයවල්, වැලි පර සහ කොරල් පර වල  ස්ථානීය වශයෙන් දුර්ලභ ලෙස හමුවන දේශීය පක්ෂියෙකි. කලාතුරකින් වෙනත් එවැනි වියලි කලාපීය වෙරල තීරයන්ගේද හමුවේ. තනි තනි පක්ෂීන් ලෙසින්, ජෝඩු වශයෙන් මෙන්ම කුඩා රංචු වශයෙන්ද දිවි ගෙවන මෙම පක්ෂියා කලපු වල නොගැඹුරු ජලයේ මෙන්ම මුහුදු වෙරලේ උදම් සීමාවේ ඇවිදිමින් හෝ ජලයේ බැස ගමන් කරමින් ප්‍රධාන වශයෙන් කකුළුවන් සහ බොහෝවිට සමුද්‍රිය වැලි පණුවන් සහ මොලුස්කා විශේෂ ගොදුරු කරගැනීම සිදුකරයි. කකුළු ඔලෙවියා මැයි සිට ජූනි දක්වා කාලයේ වෙරල තීරයට ආසන්න වැලි පරයක අඩි 2 සිට 4 දක්වා දුරකට හාරන ලද උමගක කෙලවර තනන කුඩා කුටීරයක එක් බිත්තරයක් දමා අභිජනනය කරයි.

 English Post >>

පිටකළු මුහුදු කපුටා/හීන් පිටකළු ගලුවියා (Larus fuscus)

දිවයිනේ උතුරු සහ වයඹ දිග වෙරළබඩ කලපු, ලුණු ලේවායන් සහ උදම් වගුරු බිම් වලට කුඩා හෝ විශාල රංචු වශයෙන් උතුරු අර්ධගෝලයේ ශීත සෘතුව බලපැවැත්වෙන කාලයේදී පැමිණෙන සුලභ සංචාරක පක්ෂියෙකි. එසේම වරායන් අවට කසල සොයමින් හැසිරෙන පක්ෂීන් මෙන්ම ධීවර බෝට්ටු පසු පස පැමිණෙන පක්ෂීන්ද ඇතැම්විට දැක ගත හැක. ප්‍රධාන වශයෙන් මත්ස්‍යයන් සහ වෙනත් කුඩා මුහුදු ජීවින් ගොදුරු කරගන්නා මෙම පක්ෂියා ඊට අමතරව මියගිය සත්වයන් මෙන්ම නැව් සහ ධීවර බෝට්ටු පසු පස ගොස් ඒවායින් ඉවත දමන කසල ආහාරයට ගැනීමද සිදු කරයි. පිටකළු මුහුදු කපුටා සයිබීරියාවේ සහ උතුරු යුරෝපයේ අභිජනනය කරයි.  

English Post >> 

අළු මුහුදුලිහිණියා/පොදු මුහුදුලිහිණියා (Sterna hirundo)

ශ්‍රී ලංකාව අවට සාගර කලාපයට සහ වෙරළබඩ වෙරළබඩ ප්‍රදේශවලට පැමිණෙන සුලභ සංචාරක පක්ෂියෙකි.එසේම දිවයින අවට සාගර කලාපයේ වූ කුඩා දූපත් වලද අළු මුහුදුළිහිණියා අභිජනනය කරන බවට නිරීක්ෂණය කර ඇත. කුඩා හෝ විශාල රංචු ලෙසින් දිවිගෙවන මෙම මුදුළිහිණියා මුළුමනින්ම පාහේ මුහුදේ වෙසෙන මත්ස්‍යයන්, කකුළුවන් සහ බෙල්ලන් ආදී ජීවින් ගොදුරු කරගනී.  

English Post >>

පුංචි මුහුදුළිහිණියා (Sternula albifrons)

ප්‍රධාන වශයෙන් පහත රට වියලි කලාපයේ වෙරළබඩ තෙත් බිම් වල සහ රට අභ්‍යන්තරයට වන්නට පිහිටි ඇතැම් වැව් වල සුලභව හමුවන දේශීය පක්ෂියෙකි. ඇතැම්විට තෙත් කලාපයේ එවන් ස්ථාන වලටද පැමිණේ. මෙරට සිටින කුඩාම මුහුදුලිහිණි විශේෂය වන මෙම මුහුදු ලිහිනිණියා ප්‍රධාන වශයෙන් මත්ස්‍යයන් සහ ඉස්සන් වැනි සතුන් ගොදුරු කරගන්නා අතර, බොහෝවිට ජලයේ වසන වෙනත් කෘමීන්ද ආහාරයට ගන්නවා විය හැක. බොහෝවිට තනි පක්ෂීන් වශයෙන් හමුවන මුත් එකම ප්‍රදේශයක විසිරුණු රංචු ලෙසද ගොදුරු සොයමින් හැසිරෙන ආකාරය නිරීක්ෂණය කල හැක. මැයි සිට අගෝස්තු දක්වා කාලයේ කුඩා සමූහ වශයෙන් මුහුදු වෙරලේ, වියලි මඩ වගුරු වල මෙන්ම වැව් අද්දරද අභිජනනය කරන මෙම මුහුදු ලිහිණියා විවෘත භූමියේ නොගැඹුරු ලෙස සූරාගත් වලක බිත්තර 2 හො 3 ක් දමා පැටවුන් බිහිකරයි.

English Post >>